Er GÞÞ eins í einkalífinu ?

Að taka alltaf upp veskið og vera kosý, því annars gæti einhverjum þótt hann leiðinlegur og púkó og vilja ekki vera memm ? Kallast að neyðast til að kaupa sér vini...

Eða var léttara að forðast að vera ,,leiðinlegi gaurinn " á kostnað OR ???? Og kannski víðar en í OR ??? Einkennilegt að vera í stjórnmálum og stjórnum fyrirtækja og þora ekki að segja nei !  

Erfitt að vera leiðinlegi maðurinn

Athugasemdir

[Ólafur Als, 11.10.2012 kl. 07:41]

Var hann ekki einmitt að halda því fram að hann hafi mótmælt (látið bóka og gagnrýnt) ýmsu hjá OR ... EN að hann hefði mátt standa sig betur. Þannig skil ég manninn. Gagnrýni þín er því máttlaus og beinist að röngum aðilum. Reykvíkingar sitja uppi með fjárfestingarævintýri Alfreðs og R-listans; þessa perlu sem Reykvíkingar hafa byggt upp um áratuga skeið og tryggðu íbúum orku og yl á hagstæðu verði, umfram það sem þekkist annars staðar. Það var ítrekað bent á af fjölmörgum aðilum að OR væri komin langt út fyrir sinn eðlilega ramma, sbr. rækjueldi, gagnaveitu, að reisa höll undir skrifstofustarfsemina o.m.fl. Það mun taka tíma að vinda ofan af sukkinu og allt eins víst að þeir sem bera ábyrgð muni ekki viðurkenna sinn þátt í slæmri fjárhagsstöðu OR - sem reyndar hefur legið lengi fyrir.

[Sigurður Viktor Úlfarsson, 11.10.2012 kl. 15:23]

Gulli var "leiðinlegi maðurinn" oft á tíðum og hafði stundum rétt fyrir sér og stundum rangt.

Það að segja Ólafur að OR eigi ekki að vera í gagnaveitunni er mikill misskilningur.  Ljósleiðarinn er grunnkerfi og hluti af grunninnviðum samfélagsins í dag á sama hátt og rafmagn og vatn.  Það er útilokað að það geti orðið til samkeppnismarkaður um rekstur ljósleiðara.  Menn bíða ekkert með tugi milljarða í vasanum tilbúnir að leggja enn einn ljósleiðarann.  Það verður aldrei samkeppni UM ljósleiðara - í besta falli fákeppni.  Í dag eru 2 aðilar á markaðnum, .e. Gagnaveitan og Míla.  Ef gagnaveitan verður seld er ekkert því til fyrirstöðu að þessi aðilar hækki verðskránna hjá sér um 20-40%.  Af hverju skyldu þeir ekki gera það?  Viðskiptavinirnir geta ekki flúið neitt annað.  Fólk og fyrirtæki geta ekki án ljósleiðarans verið.  Fólk tekur fjölmiðla og samskipti í gegnum hann, fyrirtæki komast í sín upplýsingakerfi í gegnum hann og án hans vita þau t.d. ekki hvað á að framleiða eða hver hefur pantað hvað.  Það skerðir verulega samkeppnishæfni landsins ef þessi þjónusta verður mjög dýr.  Þess vegna er þetta grunnkerfi og opinber aðili þarf að reka það eins og rafmagn og vatn.  Þetta þarf að vera ódýrt og það þarf að skapa samkeppni Á ljósleiðaranum því það er ekki hægt að skapa samkeppni UM ljósleiðarann.

Það getur ekki verið tilviljun að þessi umræða um að selja gagnaveituna kemur upp með merkilega reglulegu millibili.  Það hlýtur að vera einhver sem annað hvort hefur ráðið sér almannatengslafyrirtæki eða hittir blaðamenn, vini sína, í heita pottinum reglulega og kemur þessu aftur og aftur og aftur inn í umræðuna.  Dropinn holar steininn og kannski mun hann á endanum geta keypt pakkann og komið sér í einokunar/fákeppnisstöðu varðandi allt netsamband landsins.  Þá er hann líka kominn á græna grein til mjög langs tíma.

[Ólafur Als, 11.10.2012 kl. 16:41]

Sigurður, ég kann að hafa annan skilning á gagnsemi gagnaveitunnar í eigu OR en þú og það er hið besta mál. En að við séum mögulega á öndverðu meiði er enginn misskilningur. Það sem réttlætir eigu OR á gagnaveitunni er arðsemi hennar. Grunnstarfsemin á EKKI að greiða niður aðra starfsemi orkuveitunnar. Um það hljóta skynsamir menn að vera sammála. Reyndar myndi ég líkja ljósleiðara við vatnslagnir (pípur, alls kyns) og rafvíra - en ekki það sem um þessa leiðara/farvegi fer.

Ekki get ég tjáð mig um samsærishluta innleggsins hjá þér - þekki ekki innviði þeirra átaka. En þó verður að taka fram að OR hefur verið einn af hornsteinum uppbyggingar í Reykjavík og s.k. hægrimenn hafa lengi verið stoltir af því að fyrirtækið væri í almennri eigu Reykvíkinga. Það var undir stjórn R-listans og misvitra stjórnmálamanna (Alfreðs, m.a.), sem OR fór út í ævintýri, sem gerir það nú að verkum að þessi gullgæs Reykvíkinga verpir nú kolamolum. Ef gagnaveitan er á meðal fjárfestinga, sem skila arði, þá er ég vitanlega sáttur - eins og vera ber. En þá á enn eftir að nefna ýmis ævintýr önnur en þau sem ég nefndi, sbr. byggingu mörg hundruð sumarbústaða og ýmsar fokdýrar æfingar á erlendri grund.

Svo er að sjá hvort Reykjavíkurborg geti aðstoðað OR í lausafjárskuldbindingum næsta árs en ef að líkum lætur mun það kosta skattgreiðendur enn eina dúsuna.

[Sigurður Viktor Úlfarsson, 12.10.2012 kl. 01:33]

Það sem ég er að færa rök fyrir er að sú ákvörðun að taka gagnaveituna frá því að vera skilgreind sem hluti af grunnstarfsemi OR í það að vera einhvers konar jaðar(auka)starfsemi er að mínu mati mjög mikil mistök.  Mikilvægi ljósleiðarans sem grunninnviðar samfélagsins jafnast orðið að mínu mati á við rafmagn og vatn enda færi samfélagið algerlega úr skorðum ef slökkt væri á ljósleiðaranum.  Fjölmiðlar dyttu út, fyrirtæki, stofnanir, sjúkrahús o.fl. kæmust ekki í upplýsingakerfi sín og væru því algerlega lömuð.  Það eru því gríðarmikil völd sem væru færð þeim sem myndi kaupa ljósleiðarann og í krafti fákeppni gætu hann og Míla auðveldlega hækkað verulega gjaldskránna sem drægi úr samkeppnishæfni samfélagsins.

Hvað arðsemina varðar þá hljóta sömu lögmál að gilda með þá veitu eins og aðrar að gjaldskráin verður að miða við "eðlilega" arðsemi af veitunni í samræmi við skilgreindar arðsemiskröfur OR.  Hún á að borga sig upp á tilteknum árafjölda og skila eðlilegri arðsemi í samræmi við áætlanir.  Það er stöðugt meiri eftirspurn eftir bandvídd og það kæmi mér mjög á óvart ef ekki væri hægt að ná almennilegri arðsemi af gagnaveitunni.  Það þarf hins vegar auðvitað að greiða hana niður mun hraðar en aðrar veitur þar sem ljósleiðarinnar mun að öllum líkindum úreldast mun hraðar en rörin - án þess að neitt hafi enn komið fram sem líklegt er til að velta ljósleiðaranum af stóli í náinni framtíð.